ང་ཚོའི་སྐོར།

ཚོགས་པའི་རྒྱབ་ལྗོངས།

ང་ཚོའི་རྩ་བའི་བྱུང་རབས་དང་དམིགས་ཡུལ་གྱི་འབྱུང་ཁུངས་ནི། ཕྱི་ལོ་ ༡༩༩༧ ལོར་རྒྱ་གར་རྡ་རམ་ས་ལ་ནས་འགོ་འཛུགས་བྱས་ཤིང་། སྐབས་དེར་བོད་མི་སྐྱབས་བཅོལ་བ་དང་ས་གནས་ཡུལ་མི་རྣམས་ལ་ཤེས་ཡོན་དང་སྤྱི་ཚོགས་ཞབས་ཞུའི་རོགས་སྐྱོར་བྱེད་ཆེད། “ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་” (Lha Charitable Trust) གསར་འཛུགས་ཞུས། བོད་མི་གསར་འབྱོར་བ་མང་པོ་ཞིག་ལ་བཟོད་སྒོམ་དང་སྙིང་སྟོབས་ཆེན་པོ་ཡོད་ནའང་། སྐད་ཡིག་དང་། ཤེས་ཡོན། ཉེར་མཁོའི་མཐུན་རྐྱེན་སོགས་མ་འདང་བའི་དཀའ་ངལ་ཡོད་སྟབས།

ཐོག་མར་ཨིན་ཡིག་འཛིན་གྲྭ་ཆུང་ཆུང་ཞིག་ནས་འགོ་བཙུགས་པའི་གཞི་རིམ་གྱི་ལས་འགུལ་འདི། ད་ཆ་གཟེངས་རྟགས་དང་ངོས་འཛིན་ལྡན་པའི་སྤྱི་ཚོགས་ཞབས་ཞུའི་ཚོགས་པ་ཆེན་པོ་ཞིག་ཏུ་གྱུར་ཡོད། མི་ལོ་སུམ་ཅུ་མ་ཟིན་ཙམ་གྱི་རིང་ལ། ཚོགས་པ་འདིས་མི་གྲངས་འབུམ་ཕྲག་མང་པོའི་མི་ཚེར་བཟང་ཕྱོགས་ཀྱི་འགྱུར་བ་གཏོང་ཐུབ་པ་བྱུང་ཡོད། ཚོགས་པ་འདིས་ཤེས་ཡོན་དང་སྤྱི་ཚོགས་ཞབས་ཞུའི་བརྒྱུད་ནས་མི་མང་ལ་གོ་སྐབས་གསར་པ་བསྐྲུན་པ་མ་ཟད། བོད་ཀྱི་རིག་གཞུང་འཛིན་སྐྱོང་བྱེད་པར་ཡང་ཞབས་འདེགས་ཆེན་པོ་ཞུས་ཡོད།

ཁེ་ན་ཌའི་ “ལྷ་བོད་ཀྱི་གཅེས་ནོར་མཐུན་ཚོགས་” གསར་འཛུགས།

ཕྱི་ལོ་ ༢༠༢༥ ལོའི་ཕྱི་ཟླ་ ༥ པའི་ནང་། ལྷ་ཚོགས་པའི་སྔོན་མའི་འགོ་ཁྲིད་རྣམས་ཀྱིས་ཁེ་ན་ཌའི་ནང་ “ལྷ་བོད་ཀྱི་གཅེས་ནོར་མཐུན་ཚོགས་” (Lha Tibetan Heritage Society) གསར་འཛུགས་ཞུས་ཤིང་། ང་ཚོའི་སྔར་གྱི་སྤྱི་ཚོགས་ཞབས་ཞུའི་ལོ་རྒྱུས་བཟང་པོ་དང་། ལག་ལེན་གྱི་ཉམས་མྱོང་། རིན་ཐང་ལྡན་པའི་དམིགས་ཡུལ་བཅས་གཞིར་བཞག་སྟེ། ཁེ་ན་ཌའི་སྤྱི་ཚོགས་ནང་ལས་གཞི་སྤེལ་རྒྱུའི་སེམས་འགུལ་དང་ཆོད་སེམས་བརྟན་པོ་ཡོད།

ལྷ་བོད་ཀྱི་གཅེས་ནོར་མཐུན་ཚོགས་ནས་བྱམས་བརྩེ་དང་། སྙིང་སྟོབས། དྲང་བདེན་གཞིར་བཅོལ་ཏེ། བོད་ཀྱི་སྐད་ཡིག་དང་ནང་ཆོས་རྒྱུན་འཛིན་དར་སྤེལ། ཤེས་ཡོན་དང་སྤྱི་ཚོགས་བདེ་དོན་སོགས་ཀྱི་ལས་དོན་སྒྲུབ་རྒྱུ་ནི་ང་ཚོའི་གཞི་རྩའི་དམིགས་ཡུལ་ཡིན། ང་ཚོས་སྔར་གྱི་ཉམས་མྱོང་དང་། བྱུང་རབས། རིན་ཐང་ལ་དཔེ་བླངས་ཏེ། ཁེ་ན་ཌའི་ནང་རང་སྐྱོང་དང་རང་དབང་གི་སྒོ་ནས་དམིགས་བསལ་གྱི་འོས་འགན་འཁུར་ཏེ་ཞབས་ཞུ་གང་ཐུབ་ཞུ་རྒྱུ་ཡིན།

ང་ཚོའི་གཙོ་བོའི་དམིགས་ཡུལ།

• མི་སྒེར་གྱི་ནུས་པ་གོང་མཐོར་དང་སྤྱི་ཚོགས་ཡར་རྒྱས་གཏོང་རྒྱུ།

• གསར་འབྱོར་བ་རྣམས་ལ་སྤྱི་ཚོགས་འབྲེལ་མཐུད་དང་ཞབས་ཞུའི་རོགས་རམ་བྱེད་རྒྱུ།

• མ་འོངས་མི་རབས་གསར་པ་རང་ངོ་ཤེས་ཤིང་ངོས་འཛིན་ཐུབ་པ་དང་། རིག་སྟོབས་གོང་འཕེལ། ཞི་བདེ་དཔལ་ཡོན་ལྡན་པའི་སྤྱི་ཚོགས་ཤིག་སྐྲུན་རྒྱུ།

གཞུང་འབྲེལ་གནས་བབ་དང་ཕྱི་གསལ་ནང་གསལ།

“ལྷ་བོད་ཀྱི་གཅེས་ནོར་མཐུན་ཚོགས་” ནི་ཁེ་ན་ཌའི་ཁེ་མེད་ཚོགས་པའི་ཁྲིམས་སྒྲིག་འོག་དབུས་གཞུང་ལ་དེབ་སྐྱེལ་ཟིན་པ་དང་། ཁེ་ན་ཌ་དཔྱ་ཁྲལ་ལས་ཁུངས་ནས་གཞུང་འབྲེལ་དགེ་རྩ་ཚོགས་པ་ཞིག་ཏུ་ངོས་འཛིན་གཙང་མ་ཐོབ་ཡོད།

• མཐུན་ཚོགས་ཀྱི་དེབ་སྐྱེལ་ཨང་གྲངས། (Corporation Number): 1695573-8

• དཔྱ་ཁྲལ་ལས་ཁུངས་ཀྱི་དགེ་རྩའི་ཨང་གྲངས། (CRA Business Number): 79965 5436 RR0001