ཕྱི་ལོ་ ༢༠༢༦ ཟླ་ ༨ པའི་ཚེས་ ༨ དང་ ༩ དེ་བཞིན་ ༡༡ བཅས་ཉིན་གསུམ་གྱི་རིང་། བོད་ཕྲུག་ཁྱོན་ ༢༩ ཡིས་དུས་ཐུང་དབྱར་སྦྱོང་ལ་ཐོ་འགོད་བྱས་ཏེ་བོད་ཀྱི་རིག་གཞུང་ལ་རྒྱུས་ལོན་དང་སློབ་སྦྱོང་བྱས་ཡོད། ཚོགས་པའི་འགན་ལྷན་ཚོགས་མི་པདྨ་རྣམ་རྒྱལ་ལགས་ཀྱིས་སྣེ་ཁྲིད་དེ། ལྷ་བོད་ཀྱི་གཅེས་ནོར་མཐུན་ཚོགས་ཀྱི་གོ་སྒྲིག་འོག་བོད་ཕྲུག་དུས་ཐུང་དབྱར་སྦྱོང་དེ་བཞིན་ས་གནས་ཀྱི་གཡག་གསོ་སྤེལ་ཁང་ཞིག་དང་ཉི་མའི་རྟ་ར་གཉིས་སུ་ཚོགས་ཡོད།
ཉིན་གསུམ་གྱི་ལས་རིམ་དེ་དོན་སྙིང་དང་ཕན་འབྲས་ཆེན་པོ་བྱུང་ཡོད་ཅིང་། གཡག་གསོ་སྤེལ་ཁང་དུ་བྱིས་པ་ ༢༥ མཉམ་ཞུགས་བྱས་ཡོད། དབྱར་སྦྱོང་ལ་ཞུགས་མཁན་ཚོས་ཉིན་མོའི་ལས་རིམ་དེ་སྒོམ་དང་། ཡོ་གྷ། རང་བྱུང་ཁམས་སུ་གོམ་བགྲོད་བཅས་ནས་དབུ་བཙུགས་ཏེ། ཁོང་ཚོས་དངོས་པོ་འཚོལ་བའི་རྩེད་མོ་དང་མེ་ཕུང་གི་མཐའ་སྐོར་དུ་མངར་ཟས་ལ་རོལ་ནས་སྤྲོ་སྣང་མྱངས་པ་དང་། དེ་བཞིན་སྤྲུལ་སྐུ་འཇམ་དཔལ་དབང་པོ་མཆོག་གིས་ཞལ་འདོན་དང་བསང་གསོལ་གྱི་དབུ་འཛུགས་གནང་རྗེས། བྱིས་པ་ཚོས་ཕྱག་འཚལ་བའི་ལག་ལེན་བརྒྱུད་བོད་ཀྱི་གནས་མཇལ་སྲོལ་རྒྱུན་སྐོར་ཤེས་རྟོགས་བྱས་པ་དང་། མཐུན་པ་སྤུན་བཞིའི་སྒྲུང་ལ་གཞིར་བཟུང་ནས་འཇིམ་པའི་གཟུགས་བརྙན་བཟོས་པ། དེ་བཞིན་མོག་མོག་དང་རྩམ་པ་བཟོ་སྟངས་ཚོད་ལྟ་བྱས་པ་མ་ཟད། བོད་ཀྱི་སྙན་ངག་དང་ཞབས་བྲོ་སོགས་ཀྱི་སྐོར་ཡང་ཤེས་རྟོགས་བྱས་ཡོད།
ཉི་མའི་རྟ་རར་བྱིས་པ་ ༡༤ མཉམ་ཞུགས་བྱས་ཤིང་། དེར་འཛུལ་ཞུགས་པ་ཚོས་རྟ་བཞོན་པར་དམིགས་བསལ་གྱིས་དོ་སྣང་བྱས་པ་དང་། འདི་ནི་བྱིས་པ་མང་པོ་ཞིག་ལ་མཚོན་ན་ཉམས་མྱོང་གསར་པ་ཞིག་ཏུ་གྱུར། ཁོང་ཚོས་ཨལ་པ་ཀ་ (alpacas) དང་རྟ་ཆུང་མཉམ་དུའང་དུས་ཚོད་བསྐྱལ་བ་དང་། མདའ་རྩེད་སྦྱངས་པ། རྟ་རའི་བདག་པོ་སོན་ཇ་ (Sonja) དང་ཨུ་ཝེ་ (Uwe) གཉིས་ཀྱིས་རྟའི་འབྱུང་རབས་སྐོར་འབྲེལ་བཤད་གནང་བ་དང་། དེ་རྗེས་རྒན་རབས་པ་གཉིས་ཀྱིས་སེམས་འགུལ་ཐེབས་པའི་ལོ་རྒྱུས་གསུངས་ཤིང་། ཨོ་ཊ་ཝ་བོད་ཀྱི་གྲོགས་པོ་ཚོགས་པའི་ཚོགས་མི་སྐུ་ཞབས་འགྱུར་མེད་དབང་གྲགས་ལགས་ཀྱིས་རྟ་ཐོག་ཏུ་བོད་ནས་བྲོས་བྱོལ་དུ་ཡོང་བ་དང་རང་གི་རྟ་དང་ཁ་བྲལ་བའི་སྐོར་གསུངས་པ་དང་། ཁེ་ན་ཌ་བོད་དོན་ལྷན་ཚོགས་ཀྱི་ཚོགས་གཙོ་སྐུ་ཞབས་བསམ་འཕེལ་ལྷ་ལུང་པ་ལགས་ཀྱིས་རང་གི་ཡབ་དམ་པ་བྲོས་བྱོལ་དུ་ཡོང་བའི་སྐོར་དང་། བྱང་རྒྱ་གར་གྱི་ཀ་སྦུག་ཏུ་རྟ་ལ་ལྟ་སྐྱོང་ཇི་ལྟར་བྱས་པའི་སྐོར་གསུངས་ཡོད།
ཨོ་ཊ་ཝ་བོད་ཀྱི་གྲོགས་པོ་ཚོགས་པ་དང་སྦྱིན་བདག་བསམ་འཕེལ་ལྷ་ལུང་པ་ལགས་ཀྱིས་དབྱར་སྦྱོང་འདིར་དཔལ་འབྱོར་གྱི་མཐུན་འགྱུར་གནང་བ་དང་། པདྨ་ལགས་ཀྱི་ནང་མི་དང་ནང་མི་གཞན་ཚོས་ཟས་རིགས་དང་ལས་རིམ་གྱི་མཐུན་རྐྱེན་ཁག་རོགས་རམ་གནང་ཡོད། ལས་རིམ་འདིར་རོགས་པ་གནང་མཁན་མ་བྱན་རྣམས་དང་། མེ་སྲུང་པ། ཟས་སྣ་མཉམ་འཁྱེར་གྱི་མ་བྱན། གཞོན་ནུའི་སློབ་སྟོན་པ་བཅས་ཀྱི་རྒྱབ་སྐྱོར་ལ་ཐུགས་རྗེ་ཆེ་ཞུ་རྒྱུ་ཡིན། པ་ལགས་འགྱུར་མེད་དབང་གྲགས་ལགས་ཀྱིས་དབྱར་སྦྱོང་འདི་ལོ་འཁོར་གྱི་སྲུང་བརྩི་ཞུ་རྒྱུ་ཞིག་ཏུ་འགྱུར་བའི་རེ་བ་གནང་བཞིན་ཡོད་པ་དང་། ཨོ་ཊ་ཝ་བོད་ཀྱི་གྲོགས་པོ་ཚོགས་པས་མ་འོངས་པའི་ལས་རིམ་ཁག་ལ་རྒྱབ་སྐྱོར་བྱེད་རྒྱུར་གྲ་སྒྲིག་ཨང་གསར་ཡིན་པ་བརྗོད་པ་བཅས་ད་ཐེངས་ཀྱི་བྱེད་སྒོ་དེ་ལེགས་གྲུབ་བྱུང་ཡོད་པ་རེད།
